នារីម្នាក់កំពុងអង្គុយលក់ក្រឡានត្រូវរថយន្តបុកស្លាប់នៅស្រុកមង្គលបូរី
ថ្ងៃអាទិត្យ ទី១៩ ខែកក្កដា ឆ្នាំ២០១៥ ម៉ោង ២០:០៤
ខេត្តបន្ទាយមានជ័យ ៖ នារីម្នាក់បានស្លាប់ភ្លាមនៅនឹងកន្លែងកើតហេតុដោយសសារតែរថយន្តកាមរីបើកវ៉ាជែងរថយន្ត១គ្រឿងទៀតជ្រុលចង្កូតទៅបុកពេញយ៉ាងទំហឹង ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២ និង១០នាទីថ្ងៃត្រង់ ថ្ងៃទី១៩ ខែកក្កដា ឆ្នាំ២០១៥ នៅលើកំណាត់ផ្លូវជាតិលេខ៥ ស្ថិតក្នុងភូមិគោកទម្លាប់ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។
ប្រភពព័ត៌មានពីនគរបាលចរាចរណ៍ស្រុកមង្គលបូរីបានឲ្យដឹងថា នារីរងគ្រោះឈ្មោះ ផាត់ រស្មី អាយុ២៣ឆ្នាំ មុខរបរជាអ្នកលក់ក្រឡាន រស់នៅភូមិគោកទម្លាប់ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។ ចំណែករថយន្តបង្កម៉ាកកាមរីឆ្លាម ស៊េរីឆ្នាំ១៩៩៨ ពណ៌ស្ករ ពាក់ស្លាកលេខ ភ្នំពេញ 2F-3688 បើកបរដោយឈ្មោះ ឡាន់ ចិន្តា ភេទប្រុស អាយុ២៤ឆ្នាំ ជាកសិករនៅភូមិគោកទម្លាប់ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ។
ប្រភពដដែលបានបញ្ជាក់ថា តាមសំដីប្រជាពលរដ្ឋនៅកន្លែងកើតហេតុបានប្រាប់សមត្ថកិច្ចថា មុនពេលដែលកើតហេតុ រថយន្តកាមរី១គ្រឿងបានបើកក្នុងទិសដៅពីខាងជើងទៅត្បូង លុះដល់ចំណុចកន្លែងលក់នំក្រឡាននោះ រថយន្តខាងលើបានបើកវ៉ាជែងរថយន្ត១គ្រឿងទៀតនៅខាងមុខ ស្របពេលនោះដែររថយន្តខាងមុខបានបើកគេចគោយន្តកន្ត្រៃដោយងាកមកខាងឆ្វេងដៃ ដែលធ្វើឲ្យអ្នកបើករថយន្តខាងក្រោយ ដែលមានបំណងវ៉ាជែងនោះបួងចង្កូតគេច តែគេចជ្រុលទៅបុកនារីម្នាក់ដែលកំពុងអង្គុយលក់នំក្រឡានពេញទំហឹង បណ្តាលឲ្យស្លាប់ភ្លាមៗនៅនឹងកន្លែង បន្ទាប់មករថយន្តបានក្រឡាប់ជាច្រើនត្រឡប់ផ្ងារជើងទ្រមេឃ ចំណែកអ្នកបើកបរ និងអ្នករួមដំណើរគ្មានរងរបួសនោះទេ ។
ប្រភពបន្តថា អ្នកបើកបររថយន្តត្រូវបានប្រជាពលរដ្ឋនៅទីនោះចាប់ប្រគល់ឲ្យសមត្ថកិច្ច ដើម្បីរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមនិតិវិធីច្បាប់ ។
សមត្ថកិច្ចនគរបាលចរាចរណ៍ដែលបានទៅដល់កន្លែងកើតហេតុបានឱ្យដឹងទៀតថា សពនារីរងគ្រោះត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ។ ចំពោះរថយន្តត្រូវបានសមត្ថកិច្ចស្ទូចយកមករក្សាទុកនៅអធិការដ្ឋាននគរបាលស្រុកមង្គលបូរីដើម្បីដោះស្រាយនៅពេលក្រោយ ៕
